លោកហ៊ុន សែនថតសែលហ្វី ជាមួយកម្មការនីរោងចក្រ នៅព្រឹកមិញនេះ។
លោកហ៊ុន សែនប្រកាសបែបនេះ បន្ទាប់ពីក្រសួងមហាផ្ទៃបានបញ្ចេញបញ្ចីខ្មៅរបស់អង្គការជាតិ និងអន្តរជាតិព្រមទាំងអង្គភាពសារព័ត៌មានទទួលជំនួយពីបរទេសមួយចំនួន សរុបជាង៣០០
ស្ថាប័ន កំពុងប្រតិបត្តិការនៅកម្ពុជា។
លោក ហ៊ុន សែន ក្នុងពិធីចុះជួបកម្មករនៅរាជធានីភ្នំពេញ នាថ្ងៃទី២៥ខែតុលានេះ ថ្លែងមិន
បញ្ចេញឈ្មោះថា កន្លងទៅក្រុមទាំងនោះ បានព្យាយាមអូសទាញកម្មករ ធ្វើជាឈ្នាន់នយោបាយ សម្រាប់ធ្វើបដិវត្តពណ៌ ដើម្បីចង់ផ្តួលរំលំរដ្ឋាភិបាល ប៉ុន្តែលោកថា ការប៉ុនប៉ងនេះ ត្រូវបាន បរាជ័យដោយរដ្ឋាភិបាល ទប់ស្កាត់បានទាន់ពេលវេលា។
លោក ហ៊ុន សែន ថ្លែងទៀតថា រដ្ឋាភិបាលមានភស្តុតាងគ្រប់គ្រាន់ សម្រាប់ចាត់វិធានការនេះ ដែលលោកហៅថា ជាយុទ្ធសាស្ត្រកាត់ស្មៅក្រោមជើង ដើម្បីកំចាត់អ្នកបង្កើតអង្គការចាត់តាំង ជ្រកក្រោមស្លាកសិទ្ធិមនុស្ស។
លោក ហ៊ុន សែន ថ្លែងបែបរំឭកទៅស្ថាប័នជំនាញរបស់លោកថា នឹងមិនត្រូវអត់ឱនដល់ក្រុម នេះឡើង។បើទោះបីជាលោកនាយករដ្ឋមន្ត្រី ព្រមានចាត់វិធានការ លើក្រុមអង្គការសង្គមស៊ីវិលមិនបញ្ចេញឈ្មោះក៏ដោយ ប៉ុន្តែកន្លងទៅសារព័ត៌មានក្នុងស្រុក បានចុះផ្សាយថា ក្រសួងមហាផ្ទៃ បានដាក់ក្រុមអង្គការសង្គមស៊ីវិលជាតិ និងអន្តរជាតិ ប្រព័ន្ធផ្សព្វផ្សាយឯករាជ្យមួយចំនួន សរុប ជាង៣០០ស្ថាប័ន តែក្នុងចំណោមនោះមិនមានសារព័ត៌មានជាតិខ្មែរទេ ស្ថិតក្រោមការឃ្លាំមើល ដោយថា អាចជាប់ពាក់ព័ន្ធនឹងបដិវត្តពណ៌។
ចំពោះអ្នកវិភាគនយោបាយ លោកបណ្ឌិត ឡៅ ម៉ុងហៃ វិភាគថា សារប្រមានរបស់រដ្ឋាភិបាលនេះ អាចជាលេសមួយទៀត ឈានទៅបិទអង្គការសង្គមស៊ីវិល ដែលធ្វើការលើកស្ទួយសិទ្ធិមនុស្ស។ ប៉ុន្តែលោកថា ចំណាត់ការនេះ ហាក់បង្ហាញថា រដ្ឋាភិបាលកំពុងដើរចេញពីរបបប្រជាធិបតេយ្យ សេរីពហុបក្ស។
លោក ឡៅ ម៉ុងហៃ វិភាគដែរថា បើរដ្ឋាភិបាលចាត់វិធានការនេះដូចការគំរាមមែន លោកថា ភាពផុយស្រួយ នៃការបែកបាក់ជាតិ បានឈានមកដល់ និងថា វិបត្តិសង្គមនឹងអាចកើតមាន ឡើង។
ទោះជាយ៉ាងណា ក្នុងពិធីនោះដែរ លោក ហ៊ុន សែន ក៏បានព្រមានថ្មីទៀតថា អង្គការចាត់តាំង របស់គណបក្សប្រឆាំង នឹងត្រូវរំលាយនៅពេលខាងមុខ និងបានអះអាងថា បើតំណាងរាស្ត្រ និងមន្ត្រីឃុំ-សង្កាត់ ស្ម័គ្រចិត្តមករួមរស់ជាមួយបក្សកាន់អំណាចវិញ ពួកគេនឹងត្រូវរក្សាតំណែងឲ្យនៅដដែល។
ប៉ុន្តែទីប្រឹក្សាជាន់ខ្ពស់របស់គណបក្សសង្គ្រោះជាតិ លោក គង់ គាំ ថ្លែងកាលពីថ្ងៃទី២៣ខែតុលា ដោយ គំរាមវិញថាបើរំលាយគណបក្សឆាំង កម្ពុជានឹងជួបវិបត្តិ ដោយសហគមន៍អន្តរជាតិនឹងមិនទទួលស្គាល់លទ្ធផលបោះឆ្នោត ហើយ គណបក្សបក្រឆាំង នឹងនៅតែមានផែនការយុទ្ធសាស្ត្រ ដើរទៅមុខតាមឆន្ទៈរាស្ត្រ។
ទោះជាយ៉ាងណា សហគមន៍អន្តរជាតិ និងប្រទេសលោកសេរីជាច្រើន មានសហរដ្ឋអាមេរិក សហភាពអឺរុប និងអង្គការសហភាពអន្តរសភា IPU ដែលមានសមាជិក១៧៣ប្រទេសផងនោះ បានគំរាមដាក់ទណ្ឌកម្ម លើរដ្ឋាភិបាលកម្ពុជាប្រសិន បើបក្សប្រឆាំងដ៏ដំមួយនៅកម្ពុជា ត្រូវ បាន គេរំលាយមែននោះ។
ក៏ប៉ុន្តែលោកហ៊ុន សែនហាក់បីដូចជាមិនញញើតនឹងការគំរាមទាំងនេះឡើយ៕
0 comments:
Post a Comment