ច្បាប់ថ្មីទាំង៤នេះនឹងដាក់ឲ្យប្រើប្រាស់យ៉ាងប្រញ៉ាប់ បន្ទាប់ពីក្រុមប្រឹក្សាធម្មនុញ្ញបានពិនិត្យនិង យល់ព្រម នៅរសៀលថ្ងៃពុធ។
ច្បាប់ចំនួន៤ ដែលបើកផ្លូវឲ្យដកហូតអាសនៈបក្សនយោបាយណា ដែលត្រូវរំលាយដោយតុលាការ នោះរួមមាន ច្បាប់ស្តីពីការបោះឆ្នោតជ្រើសតាំងតំណាងរាស្ត្រ ច្បាប់ស្តីពីការបោះឆ្នោតជ្រើសតាំង ព្រឹទ្ធសភា ច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ-សង្កាត់ និងច្បាប់ស្តីពីការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ។
កាលពីសប្តាហ៍មុន រដ្ឋសភានិងព្រឹទ្ធសភាកម្ពុជា បានប្រជុំអនុម័តនិងសម្រេចយល់ព្រមយ៉ាងឆាប់ រហ័ស លើសេចក្តីស្នើកែច្បាប់ចំនួន៤នេះ ហើយត្រូវបានក្រុមប្រឹក្សាធម្មនុញ្ញឯកភាពទាំងស្រុង កាលពីថ្ងៃ អង្គារ៍ ទី ២៤ តុលា ឆ្នាំ ២០១៧។
ក្នុងព្រះរាជក្រមចំនួន៤ ចុះថ្ងៃទី២៥ខែតុលាឆ្នាំ២០១៧ ព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី បានសម្រេចឡាយព្រះហស្ថលេខា និងដាក់ឲ្យប្រើប្រាស់ច្បាប់បោះឆ្នោតចំនួន៤នេះ តាមការបង្គំថ្វាយដោយនាយករដ្ឋមន្ត្រី ហ៊ុន សែន។ ហើយ បើតាមព្រះរាជក្រម សេចក្តីស្នើកែច្បាប់ទាំង៤នេះ ក៏នឹងត្រូវបានដាក់ឲ្យអនុវត្តន៍នៅថ្ងៃទី២៥ខែតុលានេះ តែម្តង។
ទាក់ទងករណីនេះ អ្នកនាំពាក្យគណបក្សសង្គ្រោះជាតិ លោក សុន ឆ័យ មិនទាន់មានប្រតិកម្ម
យ៉ាង នៅឡើយទេ នៅព្រឹកថ្ងៃទី២៦ តុលានេះ។
ក៏ប៉ុន្តែ ក្នុងសេចក្តីថ្លែងការណ៍មួយ ផ្សាយកាលថ្ងៃទី១២ខែតុលា តំណាងពិសេសអង្គការសហប្រជាជាតិទទួលបន្ទុកផ្នែកសិទ្ធិមនុស្សប្រចាំកម្ពុជា លោកស្រី រ៉ូណា ស្មីត បានហៅចេតនា ចង់រំលាយគណបក្សសង្គ្រោះជាតិ ដែលមានអ្នកគាំទ្រជិតពាក់កណ្ដាលប្រទេសនោះថា ជាការប៉ះពាល់សិទ្ធិនយោបាយ និង សិទ្ធិមូលដ្ឋានរបស់ពលរដ្ឋ និងថា ជាការដើរថយក្រោយ នៃអនាគតលទ្ធិប្រជាធិបតេយ្យរបស់កម្ពុជា។
ចំណែក សហរដ្ឋអាមេរិក កាលពីថ្ងៃទី១៦ខែតុលា ក៏បានបង្ហាញក្តីបារម្ភចំពោះការ អនុម័តការធ្វើវិសោធនកម្មច្បាប់ ដើម្បីបែងចែកអាសនៈគណបក្សប្រឆាំងនេះដែរ ដោយជម្រុញឲ្យរដ្ឋាភិបាលកម្ពុជាពិនិត្យឡើងវិញពីទង្វើរនេះ។
ទាក់ទងនឹងរឿងនេះដែរ នៅក្នុងកិច្ចប្រជុំមួយនៅឯទីក្រុង Saint Petersburg ប្រទេសរុស្ស៊ី កាលពីថ្ងៃ ទី១៨ខែតុលា និង នៅចំពោះមុខសហភាពអន្តរសភា (IPU) ដែលមានសមាជិកមកពីប្រទេស ១៧៣ប្រទេស ក៏បានថ្កោលទោសរដ្ឋាភិបាលលោកហ៊ុន សែនដែរចំពោះគម្រោងរំលាយគណបក្ស សង្គ្រោះជាតិហើយរឹបអូសយកអសនះសភាទៅបែងចែកឲ្យគណបក្សតូចៗ៕
0 comments:
Post a Comment