លោកសម រង្សុីសោកស្តាយមិនបានមកចូលរួមពិធីបុណ្យអុំទូក នៅឆ្នាំនេះ!

ភ្នំពេញ៖ លោកសម រង្សុីប្រធានស្តីទីគណបក្សសង្រ្គោះជាតិ នៅល្ងាចថ្ងៃអាទិត្យ ១៤កើត ខែកត្តិក ឆ្នាំច សំរឹទ្ធស័កព.ស២៥៦៣ ត្រូវនឹងថ្ងៃទី១០ ខែវិច្ឆិកា ឆ្នាំ២០១៩ សម្តែងការសោកស្តាយចំពោះ ការខកខានមិនបានមកចូលរួមពិធីបុណ្យអុំទូកនៅឆ្នាំនេះ ដោយសារគ្មានក្រុមហ៊ុនអាកាសចរណ៏ លក់សំបុត្រយន្តហោះជូនលោកមកមាតុប្រទេសវិញ។

កាលពីល្ងាចមិញ ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃ ព្រះរាជាណាចក្រកម្ពុជា ព្រះអង្គបានសព្វព្រះរាជហឫទ័យ ស្ដេចយាងប្រទានភ្លើងទៀនជ័យលើ ប្រទីបព្រះបរមរាជវាំង ដើម្បីឱ្យប្រទីបដែលមកពីស្ថាប័នផ្សេងៗចំនួន ១៤ ចាប់ផ្ដើមចេញដំណើរ បណ្ដែតឡើងតាមដងទន្លេសាប ពីត្បូងទៅជើង ដែលអមដោយពិធីអុជកាំជ្រួច អបអរសាទរ ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នៅថ្ងៃទីមួយនេះ។

នៅរាត្រីថ្ងៃទីមួយនៃព្រះរាជពិធីបុណ្យអុំទូក បណ្ដែតប្រទីប និងសពះព្រះខែ អកអំបុកនេះដែរ ក៏មានការសម្ដែងសិល្បៈ និងប្រគំតន្ត្រីជូនប្រជាពលរដ្ឋទស្សនាកម្សាន្តនៅតាមទីធ្លាសាធារណៈ មួយចំនួនទៀតនៅក្នុងរាជធានីភ្នំពេញផងដែរ។

លោកសម រង្សុីក៏សូមជូនពរបងប្អូនជនរួមជាតិទាំងអស់ទទួលបានសុខសុវត្ថិភាពក្នុងដំណើរ កម្សាន្តជិតឆ្ងាយ និង សប្បាយរីករាយជួបជុំជាមួយក្រុមគ្រួសារនៅថ្ងៃទី០១នៃ ព្រះរាជពិធីបុណ្យ អុំទូក បណ្តែតប្រទីប សំពះ ព្រះ ខែ និង អកអំបុក ឆ្នាំ ២០១៩ នៅទូទាំងប្រទេស៕